.jpeg)
رواية انا وابن خالتي الفصل الخامس 5 الجزء الثالث بقلم عمرو راشد
انتي مين يا حبيبتي؟
= اووف أنتي ازاي متعرفنيش،، أنا خطيبة عبدالله
خطيبته!!
= اه خطيبته ومحدش هيعرف ياخده مني
فلاش باك
" دانوم شاور بصباعه على هارون وبدأ يلف صباعه في الهوا،، لقيت جنازير ضخمة جدا بتلف على جسم هارون وبتخن*قه،، كان بيحاول يشيلها لكنها صعبة جدا،، في نفس الوقت الجنازير كانت بتلف على جسم شاهر وبتخن*قه،، كلنا كنا خايفين نقرب منه،، فجأه هارون وشاهر ظهرو ب شكلهم الحقيقي وسابو الجسم البشري اللي كانو فيه وبدأوو يحار*بو دانوم،، محدش فينا كان عارف يتصرف ازاي،، مروان جري بسرعة من جنبي
يا مروان رايح فين؟
" دخل أوضة النوم،، دقيقتين بالظبط وفجأة سمعت صوت قرآن عالي جدا جدا في البيت،، تحديدا كانت اية الكرسي
" الله لا إله إلا هو الحي القيوم. لا تأخذه سنة ولا نوم له ما في السماوات وما في الأرض من ذا الذي يشفع عنده إلا بإذنه يعلم ما بين أيديهم وما خلفهم ولا يحيطون بشيء من علمه إلا بما شاء. وسع كرسيه السماوات والأرض ولا يؤوده حفظهما وهو العلي العظيم "
" الاية فضلت تتكرر كتير جدا،، ساعتها عبدالله بدأ يقول بصوت عالي
الله اكبر،، الله اكبر
" دانوم كانت عنيه كلها غضب و شر،، فجأه صرخ صرخة مرعبة هزت البيت كله،، الشبابيك كلها اتفتحت والازاز اتكس*ر،، بعدها اختفى من البيت،، شاهر و هارون رجعو للجسم البشري تاني،، ووسط ما احنا واقفين وبنراقب اللي بيحصل لقيت شاهر اتكلم و بيزعق ل مروان وبيقول
هو انا قولتلك تعمل كدا؟،، مين قال ان اية الكرسي تشتغل دلوقتي،، احنا اتفقنا نبدأ ب أسماء الله الحسنى وبعدها ندخل ب انزل يا جميل في الساحة،، أنا عايز اقابل المدير بتاعك لو سمحت،، هاتولي المدير
" عبدالله وقف جنب شاهر وقاله
طب اهدى بس وكل حاجة هتتحل
= اهدى ازاي،، هو احنا قليلين ولا ايه؟،، احسن يكونو فاكرين اننا قليلين لا دا انا بنت اختي متجوزة ظابط
طب وايه يعني متجوزة ظابط؟
= كان عاملها فرح متعملش لحد قبل كدا،، فرح بحق وحقيقي،، كفاية انه بدأ الفرح ب أسماء الله الحسنى،، والبوفيه ما شاء الله كان فيه خيرات ربنا كله من اول البقسماط ابو كمون دا
قصدك ابو سمسم؟
= لا ابو سمسم دا حاجة تانية،، دا واخد ركن في قلبي كفاية انه بيدوب كدا في كوباية الشاي،، التاني ابو كمون بقا مش فاكر بيقولو عليه ايه هنا في مصر،، اسمه ساديو مانيه تقريبا
قصدك باتون ساليه؟
= بالظبط،، كان موجود من اول اللي انت قولته دا لحد البوفتيك والفراخ وكله،، و الناس كلها كانت بتاكل ومبسوطة،، وسوسو كمان كانت بتاكل
ملكش دعوة ب سوسو يا عم شاهر لو سمحت
= هي تخصك؟
تخصني ايوا
= حقك محدش يلومك
" هارون زعق بصوت عالي جدا في اللحظة دي
انتو بتقولو ايه؟،، ايه اللي انتو بتتكلمو فيه دا؟،، سايبين المصيبة اللي احنا فيها وقاعدين تشوفو سوسو اكلت من البوفتيك ولا لا؟
" شاهر رد عليه وقال
ماهو قالك ملكش دعوة ب سوسو عشان تخصه واحنا منحبش نخوض في الاعراض
= انت حسابك معايا بعدين،، واقفين وبنحار*رب وانت بتطمن هو جاب شامبو ولا لا؟،، اسمع يا شاهر انت لو مبطلتش كلامك اللي ملوش معنى دا
هتعمل ايه؟
= انا اللي هرجعك عالم الجن بنفسي،، أظن انا نبهت
" مروان قرب من هارون وقال
طب هو كدا مش هيرجع تاني؟
= المفروض انه دلوقتي يكون عرف أن الحر*ب معانا هتكون صعبة ف هيضطر يلجأ لحد يساعده
يعني ممكن يستدعي حد تاني؟
= او ينضم ل لوسيندا
طب ماهو كدا الموضوع هيتصعب اكتر يا هارون
= مفيش حاجة هتكون صعبة طول ما احنا مع بعض و اظن كلكو شوفتو دا،، احنا بنكمل بعض وبجد يا مروان شكرا ليك،، انت انقذتنا كلنا
انت كمان انقذتنا كتير،، ربنا يكملها على خير ونعدي كلنا المرحلة دي
" في اللحظة دي شاهر ابتسم وقال
طب ايه،، مش هناكل بقا؟
" قعدنا ناكل كلنا،، أنا و مروان كنا قاعدين جنب بعض وشاهر وعبدالله وهارون قاعدين مع بعض وطبعا شاهر مكنش هيعديها بسهولة كدا،، لكن عبدالله هو اللي بدأ الكلام مع شاهر وقال
انا مستغرب ازاي انت جن وبتاكل عادي زينا؟
= أولا عشان انا في جسم بشري ف لازم يبقا مصدر طاقة في الجسم دا عشان اقدر اعيش بيه،، ثانيا الجن بياكلو عادي هما مش بني آدمين ولا ايه؟
ايوا بتاكلو ايه بقا؟
= يعني مثلا ممكن على الفطار نسلق بيضة و معاها ثمرة فاكهة مع كوب الا ربع من النسكافيه البلاك من غير سكر خالص او ممكن نص معلقة يعني،، في الغدا ممكن ربع فرخة مسلوقة مع طبق سلطة ومعلقتين رز،، أما في العشا بناكل نفس طبق السلطة وممكن فاكهة بقا وعلبة زبادي
طب دا نظام أستاذة أمينة شلباية،، الجن بقا نظامهم الغذائي ايه؟
= احنا بناكل زي البني آدمين بالظبط،، الجن بياكل مع البني ادم لو الشخص مقالش بسم الله الرحمن الرحيم،، اما لو قال بينصرف ومش بياكل معاه،، الجن بياكل كل حاجة،، بياكل عضم ونبات و حشرات،، كله
طب هو فعلا الشخص لو محطش ايده على بوقه وهو بيتاوب،، الشيطان بيعمل بيبي في بوقه
= ايه يابني القر*ف دا على الاكل،، ليه كدا بس،، وبعدين هو الشيطان هيسيب حمامات الدنيا كلها وييجي يعملها في بوقك
طب خلاص متضايقش،، امسك دا
= دا ايه؟
سندوتش مكس عامله بنفسي،، جبنة رومي على عسل على حلاوة،، دوق وقولي رأيك
" شاهر بدأ ياكل السندوتش لحد ما خلص من غير ما يقول ولا كلمة بعدها بص ل عبدالله وقاله
هو حلو بس تلاتة بالله العظيم لو عملتلي منه تاني هر*ميك انت والسندوتش من الشباك
" بعدها مروان قرب مني وقال بصوت واطي
احنا لازم نكلم مامتك ونحذرها،، دا احنا لازم نروحلها مش نكلمها بس
= يااربي أنا معرفش ازاي نسيتها
وخلي بالك كمان اننا متصلناش بيها من ساعة ما كنا رايحين المطار يعني زمانها قلقانة علينا
= طب احنا عايزين نكلمها دلوقتي وبكرا نروحلها
" استأذننا منهم وقومنا،، دخلنا اوضتنا واتصلنا ب ماما لكن مردتش،، مرة واتنين وتلاتة،، مروان قالي
يمكن تكون نايمة
= وهي حتى لو نايمة مش هتسمع التليفون يعني؟
جايز،، احنا بكرا هنروح ونطمن عليها و ان شاء الله تكون كويسة
= ماما لو حصلها حاجة انا مش هستحمل يا مروان
والله ما هيحصل حاجة،، خليكي واثقة في ربنا وانا جنبك مش هسيبك
" قرب مني أكتر وخدني في حضنه،، مكنتش حاسة بأي حاجة وانا جوا حضنه،، مفوقتش غير على صوت جرس باب الشقة،، خرجت من حضنه وفتحت باب الأوضة و روحت افتح باب الشقة لقيت،، واحدة لابسة لبس قصير جدا يعتبر مش مغطي اي حاجة من جسمها كانت بتبصلي وهي مبتسمة
هو بودي فين؟
= بودي مين
عبدالله،، هو مش عبدالله موجود هنا؟
= ومين أنتي
أنا خطيبة عبدالله
= خطيبته!!
خطيبته اه ومحدش هيعرف ياخده مني
" زعقتلها وقولت
لو مقولتيش انتي مين هقفل الباب
" مروان وهارون وعبدالله و شاهر اتجمعو ووقفو جنبي لكن هي بمجرد ما شافت عبدالله،، فتحت باب الشقة وقربت منه جدا وقالت بصوت ناعم
هو انت مقولتش لحد يا بيبي اننا اتخطبنا؟،، طب ينفع كدا؟
" بدأت تقرب من شفايفه وبا*سته،، في اللحظة دي شاهر بص ل هارون وقاله
هو دا الجزء الجديد من fifty shades of grey
= لا دا باين عليه الجزء الجديد من بلاش تبو*سني
#بقلم : #عمرو راشد
" لكن عبدالله بعد عنها وقال
انتي جاية هنا ليه؟،، احسنلك امشي
= في إيه يا بيبي،، أنا جاية عشانك
" شاهر اتكلم ساعتها وقال
الله انا كان نفسي حد يقولي يا بيبي
" عبدالله رجع يكمل كلامه معاها
انا مليش علاقة بيكي ومش هيبقا فيه أي حاجة بيني وبينك
" اتكلمت انا ساعتها وقولت
ما تفهموني مين دي يا جماعة
" شاهر رد عليا
دي لوسيندا اللي استغفر الله العظيم بتعبد ابليس
" بصيتلها بغيظ وقولت
و كمان جاية لحد هنا،، دا أنتي مش هيطلع عليكي نهار
" شاهر رد عليا وقال
براحة عليها يا جماعة دي ضيفة برضو
" مروان اتكلم هو كمان وقال
بصي انتي احسنلك امشي بدل ما تتأ*ذي
" شاهر رد عليه وهو باصصلها ومبتسم
طب ما تيجي تتفضلي جوا،، أنا بعمل كركديه تحفة
" عبدالله في اللحظة دي زعق وقال
ما تتكلم يا هارون،، انت ساكت ليه
" هارون كان واقف اخر واحد فينا،، مشي وقرب منها اكتر لكنها اتكلمت هي الاول
تعرف يا هارون اني ساعات بحس انك غبي بس دا ميأثرش على اعجابي بيك لكن برضو أوقات بقول انك غبي عشان تقرر تضحي بكل حاجة حواليك وتبقا وسط الناس دي اللي هما مش هينفعوك بأي حاجة،، خسرت كل حاجة طب وعشان ايه؟
= وأنتي خسرتي دنيتك و اخرتك عشان ايه؟
القوة والمال والجمال،، حب السيطرة على الآخرين ليها متعة غريبة يا هارون و اظن انت مجرب حاجة زي كدا
= لا مجربتش ابقا رخيص الصراحة
بقيت بتتكلم زي البني آدمين كمان،، أنا زعلانة بجد فعلا
= جاية ليه؟
" بصت ل عبدالله وقالت
جاية ل بودي،، جاية اكمل اللي بدأناه سوا
" عبدالله رد عليها وقال
احنا مبدأناش حاجة ومفيش حاجة بينا اصلا
" عضت على شفايفها وقالت
واللي حصل بينا دا كان ايه؟
" بدأنا كلنا نبص ل عبدالله ب استغراب،، شاهر في اللحظة دي اتكلم وهو باصص ل عبدالله وقال
وتقولي معملتش حاجة وتكدب عليا وانت كنت مقط*ع البوفتيك
" هارون زعق وقال
محدش يتكلم
" و رجع يبص ل لوسيندا وقال
عايزك تبلغي ابليس تحياتي وقوليله يشوف حد غيرك عشان الموضوع هيكون صعب عليكي
" فجأه هارون نفخ،، ولقينا رياح قوية جدا خرجت من بوقه وفي خلال ثواني لوسيندا كانت اختفت،، بعدها قفل الباب وقال
الكلام دا مش حقيقي،، مفيش اي حاجة حصلت بينها وبين عبدالله،، أنا بشوف الكدب في عيون البني آدمين و دي كدابة محدش يصدقها
" رديت أنا عليه وقولت
طب وماما يا هارون،، أنا عايزة اطمن عليها،، كلمتها كتير ومش بترد وأنا قلقانة
= بكرا الصبح هنروح،، دلوقتي كل واحد يدخل اوضته ونتجمع الصبح
" عبدالله دخل اوضته وانا و مروان دخلنا اوضتنا اما هارون وشاهر كانو قاعدين برا،، حاولت انام كتير لكن كنت قلقانة جدا على ماما،، خايفة عليها جدا،، وبسبب القلق دا معرفتش انام طول الليل،، الساعة كانت 10 الصبح وانا لسة صاحية،، قومت ملقتش مروان جنبي،، خرجت برا في الصالة لقيتهم كلهم قاعدين ما عدا مروان
هو مروان فين يا جماعة؟
" عبدالله رد عليا وقال
في الحمام،، معدته بتو*جعه من اول ما صحي
" لقيت مروان جاي قدامي وماسك بطنه،، جريت عليه
مالك يا حبيبي فيك ايه؟
= مش عارف،، فيه و*جع غريب ماسك معدتي
طب اجيبلك مسكن؟
= خدت و مفيش فايدة
تعالى نروح ل دكتور طيب
= لا انا هروح لوحدي،، روحي انتي ل مامتك و اطمني عليها
ازاي دا،، طبعا لا
= اسمعي الكلام يا هند،، روحي أنتي ل مامتك
" عبدالله دخل بينا وقال
طب تحب آاجي انا معاك؟
= لا مش مستاهلة،، خليك انت مع هند
" بدأنا كلنا نلبس عشان ننزل،، وفعلا خلصنا ونزلنا،، أنا و هارون وشاهر وعبدالله روحنا ل ماما و مروان راح للدكتور،، وصلنا البيت و طلعنا على السلم،، كنت متوترة جدا ومش عارفة اسيطر على نفسي،، خايفة من اي حاجة ممكن اشوفها،، لقيت باب الشقة مفتوح،، دخلت بحذر بس مكنش في اي حد في الشقة،، دخلت اوضة النوم بتاعتها لقيت لوسيندا و مروان مع بعض على السرير وقال*عين هدومهم..
يا نهار اسود،، مروان انت بتعمل ايه!!!!
#عمرو_راشد
#انا_وابن_خالتي 3 " الجولة الأخيرة " 5
#يتبع
